Signal

Cyfres ddrama fertigol 60 pennod ar gyfer TikTok (Hansh / S4C)

Mae S4C wedi comisiynu cyfres ddrama fertigol newydd ar gyfer sianel TikTok Hansh, gyda’r stori ramant i gael ei hadrodd dros 60 pennod.

Bydd y ffilmio ar gyfer Signal, sy’n dilyn y berthynas rhwng bachgen o Gaerdydd a merch o gefn gwlad Cymru, yn dechrau ar Faes Sioe Frenhinol Cymru cyn ymweld â Eisteddfod y Garreg Las, Bangor a Chaerdydd.

Daw’r comisiwn newydd, wedi’i chynhyrchu gan Gynyrchiadau Mojo, yn sgil llwyddiant drama fertigol gyntaf S4C, Yr Alwad (Cynyrchiadau Mojo), gydag enwebiadau yn y Gwobrau Ffilm Cenedlaethol yng nghategori’r Gyfres Fertigol Orau ac yng Ngwobrau Digidol Broadcast yn y categori Ffurf-Fer Orau wedi’i Sgriptio. 

Mae dramâu fertigol yn cynnwys cyfres o benodau byr a bachog sy’n para munudau’n unig, wedi eu ffilmio yn benodol er mwyn ffitio sgrîn ffôn a’u cyhoeddi ar blatfformau cyfryngau cymdeithasol.

Mae S4C yn benderfynol fod y comisiwn arloesol yn fodd o roi cyfle hefyd i ddatblygu talent newydd. Bydd gan y gyfres bedwar o awduron newydd, sef Brynach Higginson, Mari Izzard a Rhiannon Williams, ac awdur a chyfarwyddwr Yr Alwad, Alexander Williams, gyda Gwenno Hughes (Hafiach, Fflam) yn arwain y tîm.

Ar ôl galwad gastio agored, bydd y gyfres hefyd yn rhoi’r cyfle i nifer o wynebau newydd serennu ar y sgrîn, gyda Gwenan Lloyd, Gabriel Owen a Joshua Romain yn chwarae rhannau Elliw, Alffi a Tom.

Bydd Siriol Ousey (Hafiach) yn ymddangos fel Angie a Lili Mai Davies (Y Coridor, Bregus) yn chwarae Catrin.

Dywedodd Guto Rhun, Comisiynydd Cynulleidfaoedd Ifanc S4C:

“Mae arferion gwylio yn parhau i newid ac mae’n rhaid bod yn flaengar, yn enwedig wrth greu cynnwys sy’n cyrraedd cynulleidfaoedd iau."

Mae’r gyfres yn ffilmio ar hyn o bryd ac yn cael ei chyhoeddi Ionawr 2027.

“Dwi wrth fy modd yn gweld S4C yn gweithio gyda’r cwmnïau cynhyrchu i arbrofi ar gynnwys cyffrous sy’n diddanu a difyrru ein cynulleidfaoedd.”

Llion Iwan, Prif Swyddog Cynnwys S4C

“Mae dramâu fertigol yn fformat rhyngwladol poblogaidd ac yn adlewyrchu gweledigaeth S4C i drawsnewid i fod yn ddarlledwr digidol-yn-gyntaf.
“Rydym yn falch iawn yn S4C o lwyddiant Yr Alwad ac yn edrych ymlaen at wylio mwy o gynnwys sydd yn adeiladu ar y llwyddiant hwnnw. Mae cynnwys beiddgar sy’n teithio yn allweddol wrth i ni ehangu ein gwylio.”

Drama

Cynyrchiadau Mojo yn datblygu drama ar gyfer S4C am y cyfleoedd a gollwyd i atal Neil Foden

Mae S4C wedi comisiynu cyfres ddrama dair-rhan gan Gynyrchiadau Mojo fydd yn archwilio’r methiannau a’r cyfleoedd a gollwyd i atal y cyn-brifathro a’r pedoffeil, Neil Foden.

Cafodd Neil Foden, cyn-brifathro yn Ysgol Friars ym Mangor ei arestio yn 2023. Derbyniodd ddedfryd o 17 mlynedd dan glo'r flwyddyn ganlynol wedi iddo ei gael yn euog o gam-drin pedair merch yn rhywiol rhwng 2019 a 2023. Yn 2025 daeth adolygiad annibynnol i’r casgliad fod dros 50 o gyfleoedd wedi eu colli i atal y prifathro rhag ymosod yn rhywiol ar ferched.

Bydd y ddrama yn seiliedig ar dystiolaeth a nodiadau o’r achos cyfreithiol yn Llys y Goron yr Wyddgrug, ac ar adroddiad annibynnol i’r achos gan yr arbenigwraig, Jan Pickles. Bydd y gyfres yn adrodd yr hanes o safbwynt dwy ferch ifanc sy’n cael eu cam-drin. Bydd y cymeriadau hyn, a nifer o’r golygfeydd, yn ffuglennol er mwyn diogelu goroeswyr yr achos gwreiddiol.

Mark Lewis Jones (Y Golau: Dŵr, Y Sŵn, The Crown, Dal y Mellt) fydd yn chwarae rhan Neil Foden.

Bydd y ddrama yn archwilio sut y gwnaeth Foden fanteisio ar sefyllfaoedd personol y merched, yn ogystal â methiannau’r gweithdrefnau diogelu, a’r cyfleoedd a gollwyd i atal troseddau pellach.

Y Streic Fawr

Bydd Y Streic Fawr, drama tair rhan gan Cynyrchiadau Mojo, yn dilyn hanes un o’r anghydfodau diwydiannol hiraf yn hanes Prydain.

Mae 30 Ebrill 2026 yn nodi 25 mlynedd ers i 86 o weithwyr y ffatri rhannau ceir ddechrau ar streic hirfaith yn dilyn newidiadau i’w tâl ac amodau gwaith. Parhaodd y brotest am bron i dair blynedd. Er i’r gweithwyr ennill eu hachos yn y llysoedd, ni chafodd y cwmni - a gafwyd yn euog o dorri’r gyfraith - unrhyw gosb gan Lywodraeth Prydain. Ni dderbyniodd y gweithwyr yr iawndal am y ddwy flynedd ac wyth mis o fod ar y llinell biced.

A hithau wedi’i seilio ar brofiadau go iawn y gweithwyr a’u teuluoedd, mae’r ddrama yn gwneud defnydd helaeth o’u hatgofion i adrodd stori am arwroldeb y Cofi cyffredin a chyfnod cythryblus yn hanes Gogledd Orllewin Cymru. Bydd y gyfres yn rhoi gogwydd newydd drwy edrych ar yr effaith gafodd y Streic ar deuluoedd, ffrindiau a chymuned, gan ddilyn straeon personol y cymeriadau tu hwnt i’r llinell biced.

Yn y prif gast mae Rhodri Trefor (Gwlad yr Astra Gwyn; White Gold; The Indian Doctor) yn portreadu Tomi Jones, a ddechreuodd fel siop steward cyn dod yn swyddog llawn amser i Undeb y Transport and General yng Ngogledd Cymru. Mae Gruffudd Glyn (Steeltown Murders; The Martian) yn chwarae rhan Gerald Parry, areithiwr blaenllaw yn y ralïau a oedd gysylltiedig â’r streic, tra bod Rhys ap Trefor (Pobol y Cwm; Dal y Mellt; Torchwood) yn portreadu John Davis, a ddewiswyd i gynrychioli’r 86 o weithwyr yn y llys.

Ymhlith aelodau eraill y cast mae Carwyn Jones , Sion Eifion, Emyr Gibson, Catrin Powell, Manon Wilkinson a Betsan Ceiriog.

Mae’r gyfres wedi’i chynhyrchu gan Llyr Morus, ei hysgrifennu gan Ffion Dafis, ac wedi’i chyfarwyddo gan Huw Chiswell. Mae’r ffilmio eisoes wedi dechrau yn ardal Caernarfon, gyda’r bwriad o ddarlledu’r gyfres ar S4C yn hwyrach eleni.

Meddai Llyr Morus, Cynhyrchydd Y Streic Fawr:

“Fel un a gafodd ei fagu yng Nghaernarfon, sy’n cofio canu corn wrth basio’r gweithwyr ar y lein a mynd i’r ralïau ar Y Maes, mae cael dweud y stori yma, a’r ffaith bod y gweithwyr wedi ymddiried yn Cynyrchiadau Mojo i wneud hynny’n fraint.

“Mae’r aberth wnaeth yr 86 o ddynion a merched bum mlynedd ar hugain yn ôl yn anferthol. Arweiniodd yr aberth yna at newid oedd am sicrhau gwell amodau gwaith i weithwyr y dyfodol, felly mae’r diolch yn fawr iddyn nhw. Mae nodi’r hanes yn bwysig ar gyfer addysgu cenedlaethau’r dyfodol - “Ni heddiw, Chi fory”.

“Hyd heddiw mae effaith y streic i’w weld yng Nghaernarfon gyda ffrindiau, teuluoedd a chymunedau wedi ei chwalu. Mae’n bwysig bod y stori hon yn cael ei dweud yn onest, gyda chydbwysedd a gyda hiwmor, ffraethineb ac angerdd y Cofi.”

Meddai Gwenllian Gravelle, Comisiynydd Drama S4C:

“Mae Y Streic Fawr yn dod â stori un o’r anghydfodau diwydiannol mwyaf chwerw yn hanes modern Cymru’n fyw gyda grym i’n gwylwyr; stori sy’n dal i losgi oherwydd yr anghyfiawnder dwfn sydd wrth ei chraidd.

“Nid edrych yn ôl yn unig mae’r cynhyrchiad hwn - mae’n herio, yn ysgwyd, ac yn mynnu sylw. Gyda drama afaelgar a llawn tensiwn, mae’n taflu goleuni miniog ar y gwir, gan sicrhau nad yw’r hanes hwn yn pylu nac yn diflannu.”

Yr Alwad

Prosiect drama cyffrous ac arloesol ar gyfer cynulleidfa 16-24 ‘Hansh’ S4C.

Dros 7 galwad ffôn rhwng Dylan a'i fam, Emma, bydd y galwadau ffôn yn mynd â'r gynulleidfa ar daith o ddatblygiad noson allan hwyliog Dylan gyda criw o ffrindiau yng Nghaerdydd i erchylldra ei sefyllfa wrth iddo gael ei ddilyn a'i wawdio gan griw o arteithwyr. Gall ei fam neud dim ond gwrando, phoeni a thorri ei chalon yn ei chartref yn y Rhondda wrth i'w mhab gael ei guro.

Bydd fersiwn 7 x 2’ ar gyfer Hansh (TikTox / YouTube) ac ffilm fer 1 x 15’ ar gyfer S4C llinol a gwyliau ffilm. Dyma’r gyfres ‘Microdrama’ / ‘Verticaldrama’ gyntaf yn y Gymraeg.